E dopo la superstrada Pedemontana che usurperà le nostre vali e le nostre pianure par quasi 95 km de strada, dai nostri politeghi riva l’enesimo segnale del colonialismo italian, sta volta no se trata de na strada o de na base militare, ma de na discarica.
Sta discarica xe in progeto de esar fata a Monte di Malo, na sitadina colinare de l’alto Vixentin.
Da suilto, cioè da quando che ghe xe sta dito ai sitadini de l’idea de realixar sta discarica, se ga podesto notare la contrarietà dei abitanti del posto, che imediatamente i ga formà on comitato apartitico mosso da responsabilità sivile, el cui obietivo xe sensibilixar la popolasion e le varie istitusion (comune, provincia e rejon) par blocare un progeto che podaria metere a ris-cio la salute de sentenari de persone.
Ne la discarica in question, el cui progeto xe in man de la Monte Verde SRL, vegnarà scargà 325.000 tonelate de mondisie, par un totale de 250.000 metri cubi, con la conseguente produsion de 776.000 litri de percolato ogni ano in prevision che l’impianto restarà ativo par 30 ani, e tuto questo con el pasagio de 50/60 mexi pesanti, aumentando on mucio el ris-cio de incidenti vista la strada de colina particolarmente streta par tali mexi.
Oltre a tuto sto materiale che vegnarà scargà, ghe xe n’altro dato che lasa perplesi ,el progeto in question da 13 milioni de euro le ne le man de na dita con capitale sociale de 10.000 €, posibile? Dove xe la sicuresa in caso la dita la sia inadempiente? E ‘ncora, al momento no se sa chi che podarà gestir l’impianto che produxerà fiumi de percolato, che probabilmente el narà a inquinare le falde acquifere, le 7 sorgenti de acqua e un lagheto presente nel teren limitrofo.
Solo l’idea che serta xente posa aver pensà de progetar na discarica proprio in tal posto me lasa sensa parole.
Come xoventù poso solo che amirare quanto fato dal Comitato No Discarica Monte di Malo, che da mesi el se impegna a far si che la man de l’omo no la podarà a nar intacare un paesagio ancora privo de cementificasion o atività speculative.
In conclusion digo che naltri volemo un Veneto dove che prima de logiche consumisteghe e mondialiste ghe sia el rispeto de l’ambiente, esendo la nostra Tera queo che resta del pato tra i vivi, i morti e i no ‘ncora nati de na nasion.
Danieli Stefano
Portavose Xoventù Independentista
Nessun commento:
Posta un commento